金融海嘯發生前，評級機構繼續話啲跨國金融機構嘅評級依然好高，結果就梗係睇錯晒喇，自此之後，好多地區都話要自己搞番間評級公司，大陸早排就成立咗一間叫大公嘅評級公司，點知美國就唔承認。
冇所謂吖，大公照樣做評級工作，尋日仲將欠債纍纍嘅美國評級降低，即係由「AA」下調到「A+」，展望負面，以反映美國嘅投資風險。評級結果有冇牽涉到以前嘅恩怨情仇，絲絲就不得而知，只係覺得投資美國嘅資產確實係多咗風險。
美國畀人降評級，原因好簡單，就係因為量化寬鬆措施，好可能會令美元貶值，但又唔保證美國嘅實體經濟會好轉。事實上唔單只中國，好多地方都對美國又推量化寬鬆措施好反感，覺得佢哋不負責任，推高通脹之餘又推高晒啲商品價格，危及佢哋自己國家嘅經濟。
不過有市場人士就好奇怪，中國揸住咁多美國國債，竟然會將自己嘅投資降級。無他嘅，降唔降級嘅分別都唔大，反正唔會點賣㗎喇，依家美國欠中國咁多錢，中國仲好驚美國國債愈嚟愈唔值錢，不過中國又冇美國符，唔通沽晒佢咩。
余絲韻