作為打工仔，每年最關心嘅事莫過於加幾多人工，如果你係Google員工就有福喇，因為《華爾街日報》引述知情人士話，面對業界激烈嘅人才競爭，Google決定由明年一月開始調高全體2.3萬名員工薪酬多達10%，呢個加幅真係令一眾打工仔既妒忌又羨慕。
Google行政總裁施密特喺員工電郵度話，今次加人工目的係想保留Google嘅優秀人才，以及繼續吸引來自四方八面嘅出眾人才加入公司；此外，公司仲希望可藉此提升員工士氣，令全體員工都覺得付出嘅努力獲得回報。Google出招留人才「早有前科」，佢哋喺去年曾經向員工「派糖」，將派畀員工而價值大幅蒸發嘅認股權證重新定價，令認股權證唔使變廢紙，真係「明益」員工。
事實上，科技業競爭日益加劇，求才若渴嘅科技企業都不惜工本去「搶人」，例如目前全球最受歡迎社交網站Facebook旗下有近一成員工係由Google跳槽過去嘅，其他科企亦對Google員工虎視眈眈，頻頻出高價挖角，所以Google今次決定加咁多人工保留人才亦不無道理。
余絲韻