市場熱線:聯邦制藥穩步上揚

本地魚缸連續兩日跌兩百幾點,股友仲大把利潤在手,所以唔會咁易震離場。不過,呢次調整都幾大心理考驗,先沽貨獲利再候低補回?冇貨者應否趁調整吸納?古勝個心都係「十五個吊桶打水」。

恒指尋日收報24,500點,期指低水近百點,今日「大事」有:G20峰會開波、祖國公布經濟數據、恒指成分股檢討等,本來祖國嘅CPI萬眾注目,但「超4」已經揚開晒,人行尋日又宣布提高存款準備金率抽銀根,而保險股連日已有資金偷步入市等炒加息。

內房股升得短癮

古勝話炒內房股見高就要閃,結果尋日紛紛回吐,主要係市傳祖國出最狠一招──限制售價,價格管制呢樣嘢影響深遠,非不得已實施都只限於必需品,房地產呢類「商品」要限價聞所未聞,相信亦係靠嚇居多,但加息就隨時可以實施;政府同房地產嘅博弈,已明顯由政府佔咗上風。

尋日炒「扮靚股」,真係估佢唔到,個別零售股繼續有得玩,景福(00280)、JOYCE(00647)同漢登(00448)創咗新高,買金可以保值,買衫就睇荷包鬆緊,租金同棉花兩樣係未來成本兩大壓力,但漢登主要市場喺台灣同南韓,亞幣升值賺咗匯水。

今日首爾嘅G20峰會,老美肯定做箭靶,就連老美國內都充斥不滿聲音,祖國嘅評級機構大公國際好唔客氣咁將老美嘅主權評級降低,其他國家亦紛紛出招阻住熱錢湧入,甚至有人提議恢復「金本位」。

美元匯價呢排反反覆覆,歐元同日圓都回升(皆因同係印銀紙),G20顧住對付美元唔得閒理人仔,但人仔依然再創新高。

今日收市後恒指會做檢討,本來農行(01288)同友邦(01299)呢類大隻佬好應該染藍,衰在港交所已表明嫌家陣金融股成分過重,所以「加」咗幾次之後,今次可能會「減」,「貓貓狗狗」(01199)同富士康(02038)計市值有機會被踢出局,呢排股價亦冇厘精神。

藥業股呢排有翻生迹象,古勝上月底推介嘅朗生(00503)連續3支大陽燭,禮拜一推介嘅四環(00460)繼續牛皮,今日再接再厲推介聯邦制藥(03933)。

拓新產品增收入

話說間公司自從九月中批股之後,股價慢慢回升,尋日收市價僅距離高位差5%。聯邦制藥主要生產抗生素,而祖國濫發抗生素相當嚴重,係先進國嘅兩倍以上,搞到前排出現超級細菌,有關方面曾想管制。不過,醫院收入主要靠賣藥,唔開多啲藥點賺錢?所以醫改講咗咁多年都冇法解決呢個問題。

不過,聯邦亦開拓其他新產品,新胰島素係未來嘅增長動力。藥業股第三季大炒,隻隻不論大小炒到PE20倍開外,跟住要抖氣,其他內需股接力,計估值藥業股已非特別貴,好似聯邦預測PE稍低於20倍,名副其實係「內需」股,可以保持「健康」增長,呢個行業有排旺。

戰報

JOYCE(00647)+17%

帥哥指JOYCE有望創新高,昨果然創0.51元一年高位,以低位0.435元計,單日升幅達17%。

連達科技(00889)+20%

高仁上周一指連達業務已踏入正軌,昨日逆市創一年新高,較推介當日低位3.54元累升20%。

古勝

跨媒體地產網新居入伙 幾萬個精選樓盤 歡迎睇樓!

Money18新功能「18好路數」為你預測心水股票升跌機會率