絲絲講場：秦曉：退休要搵嘢做
剛喺上月退休嘅招商局集團前董事長秦曉，原來係典型退而不休嘅人！佢尋日出席金管局及國開行搞嘅論壇，畀絲絲咁啱撞到，絲絲順便問候吓佢嘅近況，佢就話自己多數時間都喺香港，偶爾返招商局Office處理吓私人事務，例如睇吓「e貓」以及一啲研究報告，至於公司會議就唔會參與喇。佢仲話最好嘅退休生活係可以輕輕鬆鬆，但又唔可以冇嘢做，否則心情會好煩躁喎。
撰文要有感而發
絲絲記得，以前秦總間中都會喺英國《金融時報》等國際刊物發表吓文章，咁退休後咪應該可以睇到多啲佢老人家嘅作品？佢就話呢啲文章要有感而發先寫喎，咁我哋惟有希望佢日日都思緒如潮啦。講到佢仍然身任理事長嘅博源基金會，目的係推動學術及政策研究，呢個會其實係猛人集中地，成員包括人行兩位副行長吳曉靈及易綱、金管局前總裁任志剛以及梁愛詩等。絲絲心諗，秦總間唔中會與其他金融界猛人聚頭，退休生活應該唔會悶！
余絲韻