孖妹缸湖遊：貨幣戰爭經濟走難

《貨幣戰爭》作者宋鴻兵曾比喻話，一個社會實體經濟運作係「整蛋糕」，貨幣系統就係「砌蛋糕」，貨幣系統可決定社會財富嘅分配，努力創造財富嘅人當然可分配得愈多「蛋糕」。各國維持寬鬆政策，擔心熱錢大量湧入，呢場「貨幣戰爭」最終會引發如一九三○年咁可怕嘅大蕭條嗎？孖妹以電郵訪問兩位身處英國嘅經濟學家及貨幣專家，佢哋都話貨幣戰爭正在爆發，擔心世界會經歷另一次更嚴重嘅經濟衰退。

施羅德投資管理貨幣投資部主管Clive Dennis認為人民幣靈活性繼續增加，其他亞幣亦會跟隨升值。

施羅德投資管理貨幣投資部主管Clive Dennis早喺八六年就開始投資事業生涯，現時主管施羅德環球貨幣精選基金。至於英國著名博客Edward Hugh，依家長留巴塞隆拿生活及工作，佢擅長以人口變化角度研究經濟問題，今年初爆發嘅歐債危機令佢一夜成名，國際貨幣基金組織（IMF）都邀請佢解決西班牙問題。

宋鴻兵喺《貨幣戰爭2─金權天下》中亦警告「嬰兒潮」發展問題，話一九六二年最後一批出生嘅「嬰兒潮」，消費能力最高峰期係○九年，當佢哋仲係47歲嘅時候，消費周期就會劇烈下滑，喺高度負債下，美國消費市場會陷入漫長冰河時期，估計「消費大蕭條」會持續14年，直至二○二四年。

Hugh︰英國著名博客Edward Hugh

放大圖片

各國自危匯策難行

莉莉︰你早喺約7年前已警告話歐元區會有危機，何解呢？

Hugh︰人口老化係危機癥結之一，目前正經歷人口學家所稱嘅「第二次人口轉變」，生育率下降到非常低水平，壽命預期不斷上升，結果人口變得更老。標普最近嘅一份報告強調，老人家期待更好嘅醫療保健及更高嘅退休金，目前我哋正腹背受敵，背後嘅危機就係過度借貸，另外就係對生活期望過高，所以先會引致今次主權債務危機。

高妹︰係咪「印銀紙」就可以慢慢解決問題？

Hugh︰依家嘅情況可以話係第4年嘅金融危機（○七年起出現次按問題）、第二次大蕭條、漫長嘅經濟衰退……日本多年來實施近乎零息政策，成為全球「套息交易」嘅中心，令日圓維持低水平，刺激出口市場增長，但當危機來臨，美國聯儲局亦照辦煮碗，採取接近零利率政策，結果當更多量化寬鬆政策（QE）出台，日圓屢創15年新高，美元就繼續下跌，日本最終只會進一步衰退。理論上，要消除外債就要令自己貨幣貶值，以恢復競爭力，但喺全球經濟危機時執行就變得非常困難，亦會導致各國關係緊張。

莉莉︰亞洲區經濟增長，會唔會引發超級通脹？

Hugh︰資金流係另一個問題，新興國家包括巴西、印度、土耳其及泰國嘅經濟增長持續升溫，但發達國家維持超低利率，引發大量外來資金流入新興市場，令當地難以執行貨幣政策。但我哋正經歷通縮，估計超級通貨膨脹（Hyper inflation）將會喺日本出現。

放大圖片

四大貨幣料面臨貶值

莉莉︰咁我哋可以點做，先可以走出呢個債務死胡同？

Hugh︰根本問題係私人及政府債務過多，國與國之間借貸失衡，直到依家似乎未有可持續嘅解決方案。由三十年代所見，一旦墮入債務陷阱，就需要一段相當長嘅時間先走番出嚟。發達國家需要持續嘅GDP增長及溫和通脹，以減少債務負擔，但呢兩樣嘢都未能達到。基本上唯一解決方法係減少貧富之間嘅不平衡，財富轉移到發展中國家，但會令較富裕國家人民相當痛苦，呢樣都係決策者唔願接受。但如果各國欠缺集體解決方案，政府受到壓力愈嚟愈大，最終會被迫採取「保護主義」，呢個都係最唔想見到嘅方案。最糟糕後果就係陷入另一次嚴重嘅經濟衰退，有可能比起我哋啱啱經歷過嘅仲要差。

高妹︰喺貨幣戰爭期間，我哋可以買邊一類資產？

Hugh︰基本上若貨幣出現大重組如布雷頓森林體系（Bretton Woods II）嘅美元和黃金掛鈎，4隻主要貨幣會逐漸失去價值，包括美元、歐元、英鎊及日圓，而需要升值嘅貨幣有人民幣、印度盧比、巴西雷阿爾及土耳其里拉等，但呢啲國家需要製造業嘅增長支持。我估計歐元未來只會同依家持平，中美之間嘅不平衡都存在喺歐元區，周邊國家如愛爾蘭、葡萄牙、西班牙、意大利和希臘仍未曾進行經濟結構改革，以提高佢哋長期嘅增長潛力。

Dennis︰施羅德投資管理貨幣投資部主管Clive Dennis

美元偏弱亞幣穩升

莉莉︰貨幣戰爭依家去到乜嘢程度？

Dennis︰貨幣戰爭已經爆發，但影響性只喺有限範圍內。美國一方面話畀市場知，QE將會接連推出，並持續好長嘅時間，咁自然就會令美元相對其他少用QE嘅國家貨幣偏弱，令資金已經過剩嘅亞洲地區面對貨幣升值壓力，迫使大舉干預匯市。目前見到亞洲貨幣兌美元正努力平穩咁升值，亦冇倒掛情況出現，所以我相信，雖然人民幣升得慢咗啲，但中國會繼續增加人民幣靈活性，其他亞幣都會跟隨慢慢升值。

高妹︰最差嘅後果會變成點？

Dennis︰減債過程非常漫長，發達國家嘅債務問題仲要好長時間消除，我哋正期待一個超級緩慢嘅經濟正增長，政府試圖迫使銀行貸款以刺激負債纍纍嘅經濟，呢個係瘋狂行為，雙底衰退會好容易重現，所以個人、企業及政府嚟緊呢幾年應該要儲多啲錢。

綜合兩位專家嘅建議，雖然上周美元跌至今年新低，但呢場貨幣戰爭未明朗化，始終唔好掂美元住。今次並唔係危言聳聽，係想話畀大家知經濟環境好多嘢未解決，睇番恒指自八月起已升逾3,000點，大家炒股時要識得止賺。