第十七屆五中全會又喺北京召開，中央領導又要度計制訂「十二‧五」規劃。大家都估，阿爺為咗減少經濟發展對基建項目同出口嘅依附，將會全力催谷內需發展，祖國嘅經濟結構就可以更加健康同埋穩定咁發展。
內需股唔使講梗係又「乘風破浪」，如果大家想一齊滑浪，可以特別留意內地嘅超市龍頭股份華潤創業（00291）。旗下三大業務分別係零售、食品同飲品，同大眾市民生活都息息相關，出售物種嘅涵蓋範圍較廣，能夠受惠於阿爺力拓內需政策方向下嘅贏家之一。
華創雖然貴為內地超市股大佬之一，但佢並冇故步自封，不甘「食老本」而又冇其他嘅增長。時下女性消費方面，化妝同美容使費有愈來愈勁嘅趨勢，華創管理層以旗下華潤零售集團之名，斥資5億元，用喺拓展本港同內地嘅健康美容零售業務，並建立自家品牌VivoPlus作為公司嘅中長期奮鬥目標。
除此之外，隨住內地市民消費能力逐漸提升，追求更高生活質素，華創亦對於內地嘅咖啡市場充滿信心。早前筆者提過佢哋完成收購著名連鎖咖啡店Pacific Coffee，期望可以喺內地嘅龐大市場大展拳腳。
雖然喺內地主要城市已經有唔少咖啡店長期進駐，但由於華創已經喺內地擁有一個完善嘅銷售網絡，只要佢哋管理層能夠將員工水平提升，要令佢哋咖啡業務做到貨如輪轉都唔係咁難。
從華創技術分析圖表所見，呢隻股喺早前創咗一年新高之後，其股價就開始下調，喺32元水平又搵到個位企住。有興趣嘅可以伺機喺呢個水平附近吸納股份。繼續追蹤！
香港大學電子金融服務榮譽助理教授 徐燦傑