絲絲講場：3香港新店「互動陳列」
流動數據全面普及，今時今日買部手機返嚟隨時「用嚟睇（互聯網）多過講（話音服務）」，所以手機網絡商賣手機都要搞搞新意思。和電香港（00215）旗下3香港喺中環新開張嘅概念店，就特別引入咗自家開發嘅「互動陳列架」，就連同系3英國嘅同事都大讚創意十足，仲有意將呢種展銷方式引入當地添！
試機接連屏幕展銷
消費者喺選擇手機及網絡商之前，往往都要親手試用吓部機，和電香港流動電訊營運總裁龍佩英（Amy）話，開發「互動陳列架」就係要畀用戶喺試用實機嘅同時，可透過接連嘅大屏幕，即時進一步了解手機各項功能、收費計劃以至相關嘅多媒體宣傳短片，佢哋設計出一套特別嘅銷售計劃，務求能透過客戶嘅第一身感受打動購買意欲，而同系3英國嘅品牌推廣同事睇過呢套銷售計劃，亦大讚香港同事嘅創意，仲有意將之引入當地。
賣手機講橋之餘，吸引嘅服務計劃亦非常重要，3香港尋日就同時推出新服務計劃，用戶只需使用指定嘅手機合約計劃，並同時選用速度介乎100M至1G嘅固網寬頻服務，就可免費獲得相同嘅流動數據用量，實行將流動與固網服務互相結合，提高競爭力。
余絲韻