絲絲講場：馮國經新書集百家大成
環球金融市場失衡，衍生出更多嘅問題，全球貿易環境當然亦變得好緊張，美國話中美貿易失衡，要求中國將人民幣升值；又有學者話各國貿易保護主義抬頭，會引發貿易戰。利豐（00494）主席馮國經（Victor）剛推出有關世界貿易嘅新書，喺世界貿易問題上，佢都算係半個專家，皆因利豐係全球連鎖供應商，業務遍布全球，佢對各國貿易應該有唔少心得。
講述世界貿易挑戰
呢本書名為《透過世界貿易促進和平與繁榮：實踐2019年願景》，書內有50多位世界貿易問題專家嘅文章，由Victor做編纂工作，佢話呢本書講世界貿易面對嘅挑戰，強調井然有序嘅貿易框架會帶嚟嘅好處，又指出貿易本身冇好壞之分，所以要制訂法則保證多邊貿易制度嘅公平公正，比起單純保護自由貿易更重要。
絲絲知道Victor向來不遺餘力推動貿易談判，佢特意加入國際商會，更成為該會主席，依家國際商會喺各地嘅分支委員會，都向當地政府進行游說，希望有助多哈回合談判達成協議。
Victor話，世界貿易嘅力量對國家穩定及發展有正面影響，當然最好係睇吓佢本書，咁就可以了解多啲喇。
余絲韻