市場熱線：中遠係時候起航

又係美金作為推手，美匯指數跌穿77之後跌勢加速，執筆時已跌到76.38，歐元1.4090、澳元0.9976、日圓81.20，衰在新加坡突然收緊貨幣政策，搞到亞洲貨幣升得更急。呢兩日淡友全面投降，紛紛轉熊為牛，尋日認購輪同認沽輪成交係9比1，咁樣一面倒法，大戶隨時掉轉槍頭。

各大板塊輪流擔正

大笨象（00005）終於起舞，升2.63%收報84元，騰訊（00700）回軟，但港交所（00388）續升5%，尋日輪到內銀股做主角，本地地主亦好快已收復失地。

呢輪資金四圍打游擊，一時炒保險，一時炒資源，一時炒吓車股，但講到銀紙貶值，炒資源就最穩陣。藥股呢排幾弱，但趁住四環（00460）今日招股，尋日亦有少許異動。

五中全會今日就開波，祖國魚缸已6連升，但升得已冇其他股市咁癲，滬綜指升幅收窄至0.64%，深成指更加倒跌。孖屐一直盛傳五中全會有好嘢公布，不過魚缸話你知有保留。

祖國話晒保留計劃經濟特色，對於控制資產價值泡沫自有辦法，甚至有傳聞話上海樓只畀減價唔畀加價，所以內地炒家寧願喺香港搵食。

既然資金氾濫，公司唔乘機抽水就笨，炒到天咁高嘅國際煤機（01683）同中國稀土（00769）先後批股，就算冇資金需要嘅公司，攞定錢未雨綢繆亦冇蝕底，所以抽水行動應該陸續有來。

講到炒落後，其中一個板塊非航運股莫屬，呢個板塊同經濟環境息息相關，但依家唔係炒復甦，所以較受冷落。不過，祖國啱啱公布嘅九月份出口增長唔夠兩成半，同前幾個月比較好似大幅回落，但需知舊年同期基數已好高，有兩成半升幅其實已還得神落。

業務涵蓋最為全面

第四季係航運旺季，波羅的海輸散貨指數（BDI）踏入十月亦回升咗12%至2,750點，中國遠洋（01919）尋日升3.72%收報9.77元，破咗前幾日高位，可以挑戰11蚊水平。

中遠係最全面嘅航運股，由乾散貨、集裝箱、碼頭同物流都做埋，高盛前排出過報告睇好中遠可「起航」，原因有三個：盈利大翻身、BDI上升同埋獲注入油輪資產，前兩者經已兌現，高盛畀嘅目標價13.8元，古勝畀嘅目標價只係11蚊略為保守，原因係隻股今年3、4次衝上11蚊樓上都企唔穩，所以暫時唔好太貪。

戰報

田生集團（08136）+14%

帥哥十月八日推介田生，昨日股價再創新高1.02元，較推介當日低位0.89元，升14.6%。

上海石化（00338）+13%

桃桃上周五指上石受惠於化工產品需求持續，股價昨日高見3.68元，累積升幅達13.93%。

古勝