人生有幾多個十年？能夠經歷三十二個寒暑真係好難得，今日係致富證券成立32周年大日子，睇住呢個「親生仔」已經長大得玉樹臨風，最老懷安慰一定係老闆周松堦；不過，周老闆今日就唔會大費周章慶祝，只會按照慣常咁與公司上下玩番個「估收市價」嘅遊戲。
致富證券資產管理部董事鄧澤堂話，喺幾個禮拜之前，同事已可參與競猜今日恒指收市價係幾多，答案最貼近嘅就會得到現金獎一份。除咗競猜遊戲之外，公司全日都會預備燒豬及蛋糕等食物畀大家享用。
致富證券亦好關懷散戶，尋日絲絲行開佢哋銅鑼灣分行時，見到添置咗部咖啡機，散戶唔使等好耐就歎到熱咖啡，適合喺呢個悶市中消磨時間，鄧澤堂話部分分行仲會提供埋雪櫃及小食等。
余絲韻