點樣喺一項投資中賺到最多錢？答案係「精準嘅眼光，同埋夠耐性」。其實呢個答案係喺一個被人稱為「忍者股東」嘅內地投資者身上搵到，呢位仁兄揸住隻ST股足足3年，最後賺咗21倍幾離場，簡直勁過股神。
內地嗰啲畀人標籤為「特別處理」嘅股份，即係連續兩年蝕錢嘅公司，所以股份前面會加ST註明。有位叫吳旗嘅ST股專家，喺○七年四月用咗1,342萬人仔，買咗當時仲未完成股權分置改革嘅「S*ST天頤」。呢隻股份同年五月就暫停上市，到公司啟動重組，佢一直揸住冇賣過。
後來公司改名三安光電，嗰市勁炒LED概念，呢隻股半年暴漲6倍，佢都唔賣；公司成為LED龍頭，股價再升多一倍，佢繼續揸。就係咁，佢一直揸住呢隻「超級牛股」3年，到今年第二季，佢終於喺十大流通股股東名單中消失，即係話隻股份賣出時應該值3.16億人仔。
佢能夠喺幾年內抵受得住倍數增長嘅誘惑，由頭食到尾，賺盡21.5倍至沽出，淨袋3億人仔，叫佢做「超級忍者」真係實至名歸。
余絲韻