孖妹缸湖遊：人仔炒升瓣瓣皆精

眾所周知，人民幣嘅升值前景已經係穩如泰山，因此人民幣理財產品愈來愈受投資者熱捧，孖妹認為都係時候重整一下投資組合，所以就搵咗花旗環球個人銀行服務投資策略及研究部主管張敏華分析各種人民幣產品嘅特色和風險，而大福證券中國業務部副總裁郭家耀就會嚴選受惠於人民幣升值嘅股票板塊，令股友可緊貼市場投資熱浪。

張： 花旗環球個人銀行服務投資策略及研究部主管張敏華

郭： 大福證券中國業務部副總裁郭家耀

人債息高 A股ETF啱炒

高妹：我想買人民幣理財產品，唔知邊種產品可賺得最多？係定存、基金、債券抑或保單？

張張：其實投資人民幣理財產品有個先決條件，就係睇你本身擁有多少人民幣。簡單啲講，人民幣長遠會升值，所以基本嘅定期存款會受惠之餘，風險亦較低，比較適合長線投資者；至於現時嘅人民幣保單都係用港元做交易，而保單嘅主要用途係保障而非投資，投保者要承受保險公司倒閉嘅風險。

莉莉：哈哈，高風險先至會有高回報嘛，我哋都想買人民幣債券或基金。

張張：可承受中等風險嘅投資者，可選擇購買在港發行嘅人民幣債券，利息較定存為高，但年期可能較長，其風險主要係匯率及流通量，人債一推出就已經超額認購，投資者想投資就要從二手市場買入。基金方面，投資者可買入A股基金，即用港元或美元做結算貨幣單位，而投資A股市場或相關中國指數嘅ETF，交易成本低之餘，買賣又方便，適合炒短線。

高妹：據我所知，人民幣債券及債券基金係有唔同，前者屬於單一嘅債券投資項目，後者係債券投資組合，風險上會有所分別，投資者千萬唔好買錯呀！

押注單一股票極高危

莉莉：咁股票又點呢？

張張：最高嘅投資風險就係買入單一股票，因為風險變得集中，如果投資者看錯方向，買錯資產，就有可能輸晒全部資金。至於受惠於人民幣升值嘅股份，投資者可選買一啲國策受惠股。

高妹：市場炒人民幣升值，我見好多人都話買航空股及紙業股，不過又唔覺升得好多喎。

郭郭：因為航空股及紙業股屬於一次過受惠於人民幣升值嘅股票板塊，只能捕捉一個短期升浪，依家再買呢類型股票唔係唔得，但就要遇上人民幣大幅升值，投資者先會有錢賺囉！長遠而言，佢哋嘅股價都係受行業周期上落影響較大。

受惠板塊吼內銀內房

莉莉：咁有冇長期受惠於人民幣升值嘅股票板塊？

郭郭：大家可留意內銀股及內房股，因為佢哋都係持有大量人民幣嘅企業。內銀股經過金融海嘯後，更見到其業務具有穩健性，加上現時市場估值偏低，投資者可趁低吸納。內房股方面，受中央調控之後，唔少內房股股價已有大折讓，故值博率高。另外亦可選擇中移（00941），公司擁有大量人民幣現金流，而且以人民幣派息，息口亦算吸引。

高妹：依家大家都吼住人民幣嘅升勢，咁你有乜嘢投資策略醒畀我哋？

郭郭：投資人民幣嘅最大秘訣就係要有耐性咁長期持有，因為貨幣匯率唔同股票股價，唔會輕易大上大落，所以畀股友嘅投機機會較細，其實投資者除咗主攻股票之外，現時投資組合亦應該持有一啲人民幣現金作保值用途。

高妹：講得啱！依家港元兌人民幣貶值，孖妹都係時候去銀行兌換兩萬蚊「人仔」儲吓啦。

日日兌換 散戶儲500萬

其實任何投資嘅竅門，最好都係早着先機，好似凱基證券荃灣分行嘅散戶李先生就醒目嘞，佢早喺○七年已每日兌換兩萬蚊人民幣做投資儲蓄，難得嘅係佢能夠兌換足一年，夾夾埋埋儲咗500幾萬人民幣，依家就將啲錢放喺內地銀行收高息。

正所謂「遲到好過無到」，依家先買人民幣理財產品未必算遲，不過李先生就提醒股友：「人民幣絕對唔係只有升值呢條單程路，匯率係可升可跌㗎，所以大家要有心理準備，唔好因為匯率上落而自亂投資陣腳。」

37%人估農行首日破底

農行（01288）將於本月十六日上市，雖然孖展認購遜於預期，但策略投資者及基金就踴躍入飛，唔知大家估計農行上市首日嘅股價表現如何？根據今期《東方產經》網上民調截至上周末晚上6時嘅結果顯示，16.4%人估升10%以上，17.4%人估升5%至10%，28.7%人估升5%以下，其餘37.5%人就相信會跌穿招股價。

高妹、莉莉

若有料報畀高妹同莉莉或有嘢問，可電郵money.biz@opg.com.hk