滙豐銀行老臣子葉迪奇借調到交行（03328）做副行長唔經唔覺已經7年，絲絲尋日喺上海見到佢，雖然時間流逝，但就冇喺佢面容留下任何痕迹，與多年前冇乜分別，真係羨煞唔少女性。
雖然葉迪奇喺交行做事都咁多年，絲絲問起佢嘅近況，先至知佢仍然係滙豐嘅人，出緊滙豐嘅糧，仲係以借調身份繼續喺交行辦事。其實佢喺交行工作嘅合約早喺去年屆滿，之不過當時將合約再延長至明年底，至於佢到時有乜打算，佢就話要睇吓滙豐與交行嘅安排。
絲絲如果冇記錯，葉迪奇應該早已年過六十，但睇嚟佢一啲退休嘅意思都冇，仲好似愈戰愈勇。佢自己就解釋點解仲要工作，話因為要養老婆仔女。講笑咩，佢啲仔女應該都出晒身，仲使佢養咩？問佢打算幾時退休，佢就話自己幾年內都冇退休計劃，咁都係好事，可以繼續為金融界作出貢獻，事關中港兩地都好需要金融人才。
本來得閒好鍾意揸飛機嘅葉迪奇，由於經常喺內地工作，相信都少咗好多機會揸飛機，佢話依家個零月先返嚟一次，只有喺香港嘅時候先至有機會再揸飛機。
余絲韻