市場熱線：潤電實力取勝

恒指上半場係悶局一場，皆因市場焦點係下半場賣地，缸邊友得個睇字，無人願入場。午後賣地由開始時拍賣官多次話要收回地皮，到最終三兄弟檔口（00016）以109億元獨資投得，呎價超過1.25萬元，打破九龍地皮最高呎價紀錄，亦係單一地皮第二高成交價，遠超市場紀錄。

歐債危機沒完沒了

賣地成績理想，帶動本地地主股價回升，恒指收報19,487點，接近全日高位，升109點；國企指數則微升2點，收報11,090點。古勝執筆時，米字旗國又被惠譽指有迫切需要削減財赤，意味歐洲債務危機正蔓延，同時亦有暗示米字旗國或有機會被降債務評級。古勝唔係盲目睇淡，而係金價續創新高，反映避險情緒從未降溫，資金未有流入魚缸，魚缸又會好得去邊。

藍色大隻佬升多跌少，而表現差的富士康（02038）跟QQ（00700），成交額有番咁上下，反映沽壓沉重，在下眼見唔少芬佬沽貨鬆人。富士康向員工大幅加薪，雖有傳獲最大客戶補貼，但估計盈利最少唔見15%，復賽後再跌3.1%，收報5.48元，盤中曾低見5.18元月內低位。

至於QQ股價無厘頭插水，盤中最低142.3元，收報143.7元，跌2.1%。跌幅最大的兩個大隻佬，昨日成交均見顯著增加，反映確實有資金流走。反而散場前股價急急腳抽上倒升的港交所（00388）、全日力撐恒指的祖國移動（00941）跟反彈的大笨象（00005），雖然股價上升，但成交卻縮水，擺明係大戶藉成交疏落，掃高股價頂住指數。碼頭港口股繼續下跌，未有隨大市回升，因歐洲的疲弱經濟將拖累香江出口表現。

本地地主在何文田地皮賣出刷新紀錄的高價後，升幅擴大，以「鄉下佬」（00017）升3%最本事，四叔增持四叔基地（00012），亦帶動股價升1.7%。跟上述三件大隻佬一樣，本地地主在反彈之際，成交未見配合，慎防買盤一日無晒影。

紅色金融股個別發展，保險股走勢較弱，皆因祖國魚缸未見起色，將影響今年保險資金的投資表現。至於紅色錢莊，以交行（03328）升3.2%最厲害，皆因周五除權，唔少捧場客欲參與供股。口痕友話有意供股者，係見去年大笨象供股後贏大鑊，食髓知味，有樣學樣，古勝則未敢太樂觀，歐洲債務危機一日未拆彈，各地魚缸仍有極大下跌的風險。

華潤電力（00836）昨日升4.03%，係大隻佬升幅冧巴溫，收報15.5元。華潤電力計劃在祖國北方省份山西省收購19家煤礦，這19家煤礦的總煤炭儲量達6億公噸，這將會令該公司每年的煤炭產量大幅增加，有助控制產電成本。

購煤礦助控制成本

另一方面，潤電管理層表示，祖國煤價近期持續上漲，由年初至今已累升約10%，預期祖國下半年電價或上調一次，不過最終上調幅度仍要視乎發改委而定。即使下半年祖國可上調電價，也不能完全彌補因煤價上漲所帶來的負面影響，所以潤電會通過多種措施盡力降低成本，包括收購煤礦，即透過自行供應以控制成本，並把今年原材料成本漲幅控制在一成之內。目前潤電持有60億至70億元茄薯，要進行收購並無集資壓力。

古勝