香港嘅小朋友真係好幸福，平時物質已經好豐富，聖誕節、生日就收禮物收到手軟，依家就連兒童節都有禮物收！尋日係國際兒童節，老友話香港資源（02882）就趁佳節送禮物畀員工嘅仔女，每位小朋友都獲發一份文具禮包。
絲絲相信唔係人人都記得尋日係兒童節，皆因香港一直沿用四月四日做兒童節，但查實世界各地好多地方都用六月一日做兒童節。雖然「六‧一」唔同「五‧一」黃金周咁可以刺激消費，但香港資源都記得呢一日，仲隆重其事咁向每位員工嘅仔女贈送一份文具。老友就笑話，自己依家只有一粒仔，不過老婆大咗肚，即係家庭成員會多一個，文具禮包有冇得打孖上先？
小朋友有文具收固然開心，香港資源旗下嘅金至尊前幾日開舖，聽講公司都向員工大派燒肉，人人有份，永不落空，務求人人開心。
余絲韻