中移（00941）董事長王建宙一生投身喺電訊行業，成日反覆研究手機功能，佢部電話應該有唔少秘密，又或者下載咗好多古靈精怪嘅玩意。絲絲最想知嘅，係王建宙最鍾意聽乜嘢歌。
據講佢部手機下載咗《Take Me Home, Country Roads》、《紅旗頌》、《梁祝》、茶花女嘅歌劇以及米高積遜嘅流行音樂等，中西合璧應有盡有，唔多唔少反映到佢對音樂嘅興趣都幾廣泛，唔知佢最鍾意玩嘅手機遊戲又係乜呢？
近日李躍接替王建宙出任中移集團總經理，王建宙就做黨組書記及董事長，市場預計係為咗接班工作做準備。王建宙主理中移咁多年，盈利節節上升，雖然近年因競爭激烈面對唔少挑戰，不過成績係有目共睹。
據講王建宙係一個好投入電訊業嘅人，一得閒就會攞部手機出嚟玩，試吓唔同嘅功能，做親身嘅體險，行緊嗰陣都會拎部電話出嚟周圍睇，試吓訊號接收得好唔好。
絲絲覺得王建宙無時無刻都反覆思考嘅性格好值得欣賞，而且佢唔係得個諗字，仲會實行，好似當年喺杭州嘅時候，佢放假就會做免費導遊帶外國遊客去西湖玩，順便練英文，所以依家出席國際場合做交流一啲問題都冇，唔講真係以為佢後生嗰陣曾出國留學添。
余絲韻