姜總口響 集資實掂
工行股東最關注嘅，當然就係佢集資幾多錢，同埋會唔會向股東伸手。當董事長姜建清話咗未決定之後，小股東就追問會唔會集資唔成功，姜總即刻信心十足咁講咗好多個「世界之最」，即係工行係全球最賺錢銀行、最大市值及最多存款銀行等，又講番咁多年盈利每年平均增長超過三成，仲話「咁好嘅股票，唔愁賣唔出」、「派息好過晒你買任何一隻債券」！
姜總咁口響，唔係冇原因，絲絲睇番三大內地上市銀行，當年禁售期完之後，策略投資者掟貨掟唔切，掟得最少嘅就係工行策略投資者高盛，仲要自願將持有八成工行股票鎖多一年。投資者咁畀面，怪唔得姜總要發新股融資都咁口響。
余絲韻