絲絲講場:耿樹森駐穗做埋翻譯?

彤叔嘅新世界發展(00017)對廣州情有獨鍾,就連當年首個喺內地投資嘅地產項目,原來都喺廣州,所謂「愛屋及烏」,加入集團已有十幾個寒暑嘅新世界中國地產(00917)華南區總監耿樹森接受集團刊物《新語》訪問時,就透露咗對廣州人和事嘅見解。

調和兩地同事思維

耿樹森專責廣州區發展十年有多,唔單止睇住廣州房地產呢個「火車頭」不斷向前衝,仲見到好多中港兩地嘅同事,由「水土不服」、「摸着石頭過河」至互補不足。佢話港人嘅國際視野係唔錯,所以初嚟甫到嘅港人都好有自信,不過內地人話晒都係地頭蟲,人脈點都廣啲,所以佢謙稱自己嘅角色似翻譯員,幫兩地同事有效咁溝通,最重要係將兩地人嘅思維方式調番勻。

為咗令華南區轄下所有同事更加團結,耿樹森早就主張「搞大佢」,即係搞多啲大型活動,好似野外拓展、球賽及運動會等,務求將人人都歡迎嘅運動規模愈搞愈大,佢話咁樣培養團隊精神兼文化最有效,所以佢不時都會落場參賽,絲絲仲發現順便可以Keep埋身形,睇吓耿生可以保養到十年如一日就知啦。

余絲韻