官商關係從來都係千絲萬縷，之前就有渣打（02888）主席戴維思棄商從政，做咗英國貿易促進及投資部長，早前又傳出滙控（00005）主席葛霖會係下一任英倫銀行行長嘅熱門人選；但亦有政壇名人反其道而行，放棄仕途進身商界，英國工黨前國會大臣簡樂芙就係例子，佢喺上周加盟滙控，負責策略小組工作。
現年42歲嘅簡樂芙，政治履歷認真唔嘢小，過往獲英國前首相貝理雅器重，曾出任英國財政大臣、教育大臣及運輸大臣等要職，可算女性中嘅佼佼者，從政之前就喺英國《衞報》當記者。
簡樂芙喺九七年加入國會，但去年捲入濫用津貼醜聞，至上月辭去國會職務。不過佢原來已經為自己鋪好後路，就係加入滙豐企業發展部門，研究城市改革及消費者保障，聽落呢份工都好適合擁有豐富政治經驗嘅佢。
簡樂芙話其實佢未決定投身滙控之前，都有考慮過加入其他私營機構，但佢覺得銀行業喺全球經濟走出衰退嘅過程中扮演重要角色，而滙控作為國際大型銀行，喺毋須政府援助下順利過渡金融海嘯，足見其實力雄厚，所以好開心可加入滙控。
佢仲強調，今後唔會將政治議題與工作扯上關係。莫非係久在樊籠裏，歷盡政客間明爭暗鬥，依家係時候要同政治劃清界線？
余絲韻