內地華遠地產董事長任志強經常語出驚人，喜歡佢嘅人欣賞佢快人快語，唔喜歡嘅就覺得佢成日以發展商身份講風涼話。佢尋日出席大連一個房地產高峰論壇時畀人掟鞋，難得佢反應好快，仲自嘲獲得「總統待遇」（美國前總統喬治布殊都畀人掟過鞋），之後就若無其事繼續演說。
任志強因乜事畀人掟鞋？話說佢上台之前，大會播放熱爆內地嘅電視劇集《蝸居》短片，其後佢上台就話：「我沒看過蝸居，但是我發現裏頭那個人（宋思明）開的車相當好，如果他能開得起這樣的車，那我想他的蝸居也是相當大的。」絲絲有睇過套劇，任志強真係有啲張冠李戴，佢以為宋思明係住喺蝸居呢！
話音未落，台下有位男士向台上掟兩隻鞋，仲大叫「去死吧」！有觀眾跟住起哄拍手叫好。「掟鞋男」之後大搖大擺向門口走去，主辦單位好尷尬，反而任志強保持鎮定，仲識得自嘲解窘。
絲絲覺得，雖然任志強講嘅說話唔係人人啱聽，但佢至少有講出心底話嘅勇氣，比起唔少講假大空說話嘅名人嚟得可愛，嗰位「掟鞋男」未免偏激咗啲喇。
余絲韻