德銀前環球銀行業務亞太區總裁張紅力最叻帶隊參加「選秀活動」爭取大「刁」，原來佢過檔工行（01398）做副行長都要參加「選秀活動」，仲要連見9名中國最重量級嘅考官，包括銀監會主席劉明康及中投董事長樓繼偉等人。
張紅力洋名叫Lee，佢喺德銀咁耐都經常勝出IPO嘅「選秀活動」，包括東風（00489）、神華（01088）等嘅IPO都係由佢簽番嚟。今次佢轉工去工行，面試時嘅考官除咗劉明康及樓繼偉，仲有工行董事長姜建清、建行（00939）董事長郭樹清及學者巴曙松等人，至於考題就係：「你作為國際投行中國業務嘅負責人，能為世界市值最大銀行帶來甚麼樣的增值？」
Lee平時咁識Sell自己銀行，呢條問題都應該會答得好好，所以成功攞到副行長嘅位。有業內人士就話，今次Lee轉工唔多唔少係因為佢喺德銀已上到「天花板」，所以才另求突破。
講開又講，點解擔任副行長一職要咁多猛人同阿Lee面試？原來工行、農行、建行、中行及交行嘅副行長一職雖然較副部級稍低，但屬於「中管幹部」，以往要黨員身份才能擔任，Lee以前効力海外投行，又唔係黨員，佢能夠破格被錄用，算係中組部首位通過市場化選聘嘅中管幹部，認真唔講得笑。
余絲韻