自金融海嘯後，部分銀行家為免被人話自己收巨額花紅，所以將部分花紅捐畀慈善機構用嚟回饋社會，俄鋁（00486）老闆歐柏嘉（Oleg Deripaska）都話要捐花紅，佢就將三分之二嘅花紅，即係價值約3.6億元嘅股份捐畀慈善機構，不過受禁售期嘅限制，呢批股份要喺兩年後先可以兌現成為善款！
佢話呢筆花紅會先捐畀佢旗下嘅慈善基金「Volnoye Delo」，即係佢嘅花紅將可以用喺俄羅斯二十多個城市，推動當地經濟發展及推動社會服務。
絲絲記得喺俄鋁嘅年報提到，歐柏嘉個人獨得花紅超過5.4億元，係為咗答謝佢成功讓俄鋁上市，佢嘅薪金當然亦分量十足，比起全球最大礦業公司必和必拓嘅CEO足足多出5倍，所以今次佢捐出少少花紅做慈善，何樂而不為。身為大老闆嘅歐柏嘉仲話，由於公司去年由虧轉盈，管理層出咗唔少力，好應該獎勵吓管理層。
余絲韻