冰島火山灰令空中交通癱瘓，好多歐洲航班嚟唔到香港，對於成日四圍出差嘅基金經理帶嚟好多不便，美盛旗下西方資產管理國際業務總監席洛夫（Mike Zelouf）原定今日來港見傳媒，講吓佢對債券市場前景嘅睇法，但佢喺「最後一分鐘」先得知班機取消，結果發布會要臨時取消。
另外，今日起一連3日舉行嘅投資座談會「World MoneyShow」，絲絲聽講好多歐洲記者都嚟唔到。
究竟冰島火山仲會噴發幾耐先停？絲絲搵過啲資料，原來火山噴發唔易停，有地震學專家話，火山噴發周期依家啱啱開始，一噴要噴成60年之久。若果屬實，咁啲歐洲基金經理咪有排困，唔通遲啲要開視像會議先得？睇嚟呢次事件唔單只令航空公司有金錢上損失，好多金融機構嘅正常活動都受阻，直情係無形損失，條數真係難計。
余絲韻