絲絲講場:趙國雄賭聖Look賀上市

尋日係置富產業信託(00778)正式喺港交所上市嘅大日子,身為主席嘅趙國雄着咗套白色中山裝襯條橙紅色嘅頸巾,認真醒神突出,絲絲驟眼睇仲以為賭聖再現。

一身造價720蚊人仔

細問之下,原來呢個打扮係有意思o架,趙生話呢套白色中山裝係為咗上市日專登喺上海度身訂造嘅,今次係第二次穿着,上次着住去一個電台活動係用嚟試身啫。

至於條頸巾亦大有來頭,叫做西藏哈達,帶有吉祥祝福之意,原本應該係白色,但為咗襯衫兼襯埋置富產業信託嘅Logo,所以就轉咗橙紅色,可見趙主席果然好着緊喎!

但如果大家以為訂造會好貴,咁就大錯特錯嘞,佢話喺上海布城造衫價錢好平,尋日嘅一身造價都只係720蚊「人仔」,佢仲話平時啲恤衫都係上去訂造,質料靚得嚟每件都只係100蚊左右,有兩間舖頭仲貼咗佢張相做生招牌添。

講番今次置富送畀港交所嘅紀念品,係一件琉璃,叫做「大業並舉」,寓意係「一元二立、天高地闊,事事砥礪,磐堅如山,功成大業萬古心」,呢首詩認真玄妙!

余絲韻