金融股升勢未完，支持前晚道指低位拗腰，倒升收市，升44點，收報10,611點。今年美國中期選舉，但就業市場就無大起色，總統奧巴馬上任時的承諾，兌現咗嘅相當有限，難怪近期日本豐田被窮追猛打，投訴回收再投訴，被陰謀論者評為政府轉移選舉視線，兼且拯救本地垂死之汽車業的一石二鳥之策。
前晚奧馬巴又一次促請中國改變匯率政策，讓市場機制決定匯率，幫助全球貿易平衡，避免美國貨處於不公平競爭環境。奧巴馬講話，聽落有骨，明顯將本地經濟責任，歸咎於價廉物美的中國貨明搶美國貨，製造貿易不平衡，兼打爛美國打工仔個飯碗。
講番港股，經已無印象，一周恒指波幅得274點，創了多久的紀錄，相信股民同筆者一樣，經已被港股過去五日的表現，悶得半死，恒指除了周一裂口升了409點之後，全個星期都無方向，兩會除減排概念外，無其他振奮人心的炒作古仔，藍籌業績普遍唔錯，亦無法令港股更進一步，恒指全個星期升421點，收報21,209點，成交愈玩愈縮，到周五唔夠500億元。
滙控（00005）令人失望的○九年業績，加埋中移（00941）錢多身痕，入股與業務毫無關連的浦發行，兩隻重磅股被睇淡，港股立即好似被綁住腳跑步一樣走唔郁。最捧滙控場的星級分析員高盛Roy Ramos，終於都捨滙控而去，將滙控剔除確信買入名單，評級由買入降到中性，理由係短期淨息差低、低貸款增長及低投資收入都影響業績表現，十二個月目標價由122元降到91元，現價81.3元，即至多得11.3%回報，認真夠趕客。
相比滙控，早前渣打集團（02888）的業績出色得多，○九年賺32.79億美元，升4.7%，回顧月初業績曝光以來，股價累積升幅12.6%，同滙控走勢有天壤之別。
渣打市值4,100億港元，過去五年盈利由20億美元起步，到今日超過30億美元，由證券界的預測，似乎對未來兩年增長能力充滿信心。綜合預測賺39.9億美元及48億美元，相當於18.6%及20.3%增幅，一○年預期市盈率13.4倍，低過歷史平均的16.3倍，而且不像滙控被流血不止的北美業務拖住，埋頭新興巿場苦幹，今日後海嘯時期，環球經濟動力集中在新興巿場，渣打有趨勢，正取替滙控成為港人的國際銀行投資首選，估值明顯未充分反映新興市場概念，股價隨時會有第二波升浪。
戴峰修