機場管理局行政總裁許漢忠尋日趁新春同絲絲食飯，講到近排中國轉口貿易轉旺，連帶本港機場一月份客貨運都有增長，史丹利（許之洋名）自然春風滿面，不過講起過新年前去台北，入住當地一家五、六星酒店嘅經歷，佢就唔係咁開心。
史丹利係呢家酒店逾廿年嘅老主顧，佢喺新年期間入住，但要延遲Check out兩個鐘，佢好聲好氣問櫃台，但被職員拒絕，佢即「撻朵」話住咗20年，職員都係Say no。史丹利係航空界大佬，見慣世面，幾曾見過如此服務態度，令佢更加不解嘅係呢家酒店嘅Gym正進行維修，佢記得兩年前嗰度已開始維修，即刻打電話問總經理，經理一邊講Sorry，一邊承諾話再多3個月一定會搞掂。
講完唔開心嘅嘢，史丹利話機管局下月中將接手管理虹橋機場嘅候機大樓，幫上海市政府處理因五月一日世博開幕而衍生嘅人流問題，雖然管理屬短暫性質，但佢亦好開心與內地機場合作。至於幾時興建第3條跑道，佢就話希望今年底前完成研究報告，但幾時興建就要問政府。
余絲韻