四年一次嘅世界盃六月就開波，球迷當然關注進入決賽隊伍嘅勝算，股神巴菲特就似乎唔多睇好法國會成為今屆世界盃盟主，事關巴郡旗下嘅保險部門最近賣出一份法國勝出世界盃嘅投保合約，如法國得勝，巴郡將要作出三千萬美元（約二點三四億港元）嘅賠償。
股神日前接受ＣＮＢＣ訪問時就話，佢呢份保單係由得力助手Ajit Jain負責掌管嘅保險部門批出，但佢唔肯透露呢份合約嘅投保者係何方神聖。
巴郡保險部門批出呢份保險，聽起嚟好似有啲奇怪，但另類風險嘅投保其實一直係巴郡保險部門嘅強項，例如佢哋曾經為美國棒球名星Alex Rodriguez合約提供保險，又為美國大學籃球賽一旦停賽作出承保。
巴郡去年第四季盈利大升二十五倍，好多人都驚嘆股神嘅投資眼光，不過巴郡旗下業務嘅員工就冇咁好彩，巴郡成衣生產業務Fruit of the Loom及地氈生產商Shaw Industries喺去年先後裁員兩成三及一成二，而巴郡旗下所有業務部門合計，去年就更合共裁減近二萬四千人，正正反映金融海嘯嘅威力。
余絲韻