絲絲講場：紀勤補飛派息撫民心
滙控（00005）去年業績令人大失所望，拖累股價勁插，佢哋嘅CEO紀勤話自己身為大笨象長期股東都覺得好失望，由於雙重身份關係，講完頭先嗰句說話，佢就即刻補飛話大笨象係妥善經營嘅公司，管理團隊又好有衝勁。
3年共派息1872億
對於有人質疑佢呢位CEO今次喺管理市場預期方面做得唔好，搞到股價大跌，佢就笑笑口咁回應，話呢個問題既有冒犯性，但亦唔算冒犯。梗係啦，事實擺在眼前，佢都好難辯駁，不過話晒都係CEO，總有說話要回應吓，佢就話大笨象過去3年向股東派息合共240億美元（約1,872億港元），試問有邊間銀行好似佢哋咁呢？而且佢哋每季都有產生資本，資本充足比率及貸存比率都處於好好嘅水平。
繼紀勤將自己400萬英鎊花紅送晒畀慈善機構後，市場又傳大笨象嘅歐洲、中東及環球業務主席歐智華亦承諾將部分薪酬捐出嚟。唉，佢大哥嘅花紅連薪酬成千萬英鎊咁多，人工仲高過CEO，捐咁啲都冇所謂喇！
余絲韻