去年由滙豐銀行工商業務部門空降到恒生銀行（00011）出任行政總裁一職，梁高美懿本周一交出掛帥後首份全年成績表。絲絲尋日見到梁太，佢坦言心情戰戰兢兢。
其實梁太喺去年四月加入恒生，五月六日先正式履新，所以佢尋日亦不忘提起前行政總裁柯清輝，笑言恒生去年嘅成績柯大俠都有份。
「不過，踏入一○年就見真章，所以要畀心機做出成績。」談及個人目標，梁太話希望可以帶領恒生全體員工進入新領域，令業務得以平穩增長。
梁太尋日亦少不免被問到對股價下跌嘅睇法，佢直認確實感到有啲失望，但希望股東對恒生保持信心，繼續投資該行股票咁話，亦希望恒生繼續做一隻「增長股」。
每年公布全年業績亦係對員工論功行賞之時。翻查年報，梁太去年嘅酬金合共483.4萬元，至於已退休嘅柯大俠去年酬金合共1,070萬元，總數遠高於梁太，主要係因為柯大俠嘅特別花紅及股份報酬共佔684.7萬元。
余絲韻