近排都有唔少證券業組織換莊，繼證券商協會早前選出蔡思聰為候任主席，證券學會早前亦已選出新接班人，李細燕將接替做咗證券學會6年會長嘅張華峰，於四月十二日正式就職。
兩屆會長張華峰退任
證券學會會長一屆可做三年，張華峰連任兩屆，即係做了6年，都算長情。李細燕由該會常務副會長，到今次坐正做會長，可以說係順理成章。
有經紀行家讚李細燕做事好勤力，親力親為。咁李細燕係咪證券學會創立以來首位女會長呢？聽啲經紀行家講，該會嘅創會會長原來已經係女士了。至於張華峰，李細燕話，佢仍會為個會出力。證券學會副會長仲包括余維強、李愛平、陳杏禮、及朱李月華。唔講唔知，朱太都係證券商協會候任副主席，與楊玳詩一樣 。
新春酒會夏佳理捧場
證券學會等五個經紀組織，下個禮拜一會喺交易所會議廳舉行聯名新春酒會，到時港交所高層夏佳理、李小加、立法會議員詹培忠等亦會畀面出席任主禮嘉賓。
余絲韻