本文重點
所謂好事成雙，喺新春佳節下，轉職加人工當然雙重快樂。原本喺大福證券擔任外匯及金業研究部董事嘅黃耀明（Bruce）已於前日離職，準備下周一「3條2」（二月二十二日）過檔一間英資金融機構返新工，而且薪酬仲接近依家嘅一倍添，真係恭喜恭喜。
出任英資行董事
年初四係Bruce最後一日喺大福返工，佢話由於自己為人比較低調，所以都冇搞甚麼歡送會或公開宣布，但就好感激大福證券嘅同事及管理層，4年多以來對自己嘅提攜同愛戴。
Bruce話佢下周一就會正式喺一間英資金融機構返工，公司名就到時先方便講喇，而職位都係董事級別，工作性質同喺大福時相若，都係以金、匯為主，並會幫新公司主力推廣零售業務。今次轉職Bruce就承認咗加薪幅度近倍嘅市場傳聞，可以話虎年有個好開始。
余絲韻