本文重點
絲絲成日聽人講，話從事金融行業嘅人凡事鍾意「向錢看」，但其實都唔一定嘅。好似恒生銀行（00011）嘅員工就好積極參與義工活動，去年服務社會超過17,000小時，包括探訪弱勢社群、兒童及獨居長者，清潔沙灘以及到郊野公園除草，真係少啲愛心都唔得。
梁太頒發簽名證書
恒生為咗鼓勵呢班義工，最近特別舉行咗個嘉許禮，出席嘅逾200名義工獲得該行副董事長兼行政總裁梁高美懿親自表揚，而服務超過50小時嘅義工更可獲頒梁太嘅親筆簽名證書。
梁太話成立恒生義工隊嘅目的，係希望同事喺工作以外嘅時間，有機會與其他同事及家人一起服務社會，並建立團隊精神。佢提到去年與一班獎學金得主嘅分享內容，話成功要訣在於「五心」，即用心、決心、耐心、虛心及恒心。梁太讚賞恒生義工不但充分發揮成功要訣嘅五個心，而且仲充滿愛心，令社會上有需要嘅人士得到幫助。
余絲韻