連續兩年喺港交所聯搞

今次係五大組織連續第2年喺港交所「擺檔」。由於去年首次喺港交所舉行，反應幾好，除咗多位官場人士、港交所前主席李業廣都畀面光臨外，更吸引咗大量業界人士出席，展覽廳擠得水洩不通，氣氛熱鬧，所以五大組織今年再接再厲。

聯合春茗嘅主意係由證券學會會長張華峰提出，證券商協會嘅蔡陳葆心和議，金融界人士一致讚好，話唔使走幾場，所謂時間就係金錢嘛！更重要係場地收費合理，經紀咁識計數，梗係識得揀啦！

證券商協會「雙喜」設宴

蔡太仲同絲絲講，三月認真多盛事，除咗聯合春茗外，證券商協會今年亦適逢30周年，下月二十二日於會展舉行30周年晚宴。該會新一屆理事會包括新主席蔡思聰，亦會喺當晚舉行就職典禮。由於喜事成雙，當晚慶祝節目會大搞，除咗筵開40席之外，蔡太話喺邀請嘉賓方面將會花更多心思，到時會見到邊位重量級人物？大家拭目以待。

至於另外兩個經紀組織──本地證券龍頭嘅證券業協會以及近日冒起得好快嘅香港中資證券業協會，佢哋今年幾時同點樣搞春茗，絲絲下回分解！

余絲韻