本文重點
潮流興搞「腦震盪」集思會，繼港交所（00388）全班高層及董事早前去咗跑馬地馬會，舉行一連兩日嘅集思會商討3年策略計劃後，本身亦係港交所董事嘅許照中，其所屬嘅僑豐金融母公司之前亦搞咗個大型集思會，但佢哋就更加勁，集團共有80人，一齊飛咗去泰國嘅布吉島一間大型Resort（度假村）開集思會，貪嗰度環境清靜，遠離煩囂，諗嘢都醒神啲喎。
遠離煩囂 傾3年大計
咁佢哋個大型集思會主要有乜嘢主題？許照中就話，真係有咁啱得咁橋，集團今次同港交所一樣，亦係傾3年計劃，不過佢哋就集中傾「搵錢計劃」，即係點樣可以賺多啲錢。
布吉島Resort出名又大又靚，佢哋舉行集思會亦選咗當地一間大型Resort，由於距離市區好遠，附近又冇乜嘢玩，摒除雜念，絲絲相信各人應該可以交足功課。
僑豐集團年年搞集思
許照中話，集團舉行集思會都已經做咗3、4年，基本上每年都做一次，但今次就較為特別，要傾長遠啲嘅計劃。由於佢哋總部設喺馬來西亞，以往集思會多數喺集團近檳城嘅Resort舉行，大約距離吉隆坡4個小時車程，今次移師布吉，算係首次衝出馬來西亞！
講開賺錢計劃，僑豐金融前日（本月九日）就率先喺深水埗開分行吸新客，令分行數目增至4間，除咗中環總行外，仲有深水埗、旺角及鰂魚涌分行。
余絲韻