淡友殺到埋身，上周三港股叫做有反彈，點知彈得一日，之後兩日恒指即時唔見咗成千點，無喇喇歐洲又話債務危機重現，恒指二萬點冇得留低，淡友愈殺愈興奮，股份日日不停跌，跌到大家無晒信心，最終都加入沽家行列，咁又點會有反彈呢，所以暫時最好都係停一步，忍一忍，切忌胡亂入市。
個市跌成咁，選股真係要步步為營，受惠國策股始終有一定優勢，可視為跌市避難所，古晨今日就吼中隻卡姆丹克（00712）。
較早前國家重申推動光伏能源行業發展，以多晶硅為原料生產太陽能晶片的卡姆丹克為配合國策，較早前已公布在江蘇省成立太陽能產品生產公司，新公司將獲5年稅務優惠及補貼，預期兩年後落成投產，產能至少可再提高一成多兩成。既然2元守得住，現價買入，目標價2.5元，跌穿1.98元止蝕。
古晨