本文重點
富士康（02038）母公司鴻海集團嘅掌舵人郭台銘今年60歲，不過佢就完全冇諗過退休，話70歲前都唔會完全退休，最多退到第二線。不過啲員工就要醒定啲喇，皆因郭董話未來10年每日只係做6粒鐘，而最重要嘅事就係要罵人，咁樣公司先會有進步。
操Fit身體等嫁女
郭董早前接受台灣《聯合晚報》訪問，講到事業時非常激情，佢話未來10年要做4件大事，包括要將經驗傳承、帶領鴻海度過經濟轉型、協助台灣科技轉型以及想鍛煉身體，佢仲話鴻海絕對唔會只係一間代工公司咁簡單。
查實郭董決定唔退休，同佢嘅寶貝女有莫大關係。前年郭董再婚，仲添咗個囡囡，今年就快一歲，郭董話囡囡年紀仲細，所以自己仲要努力工作。而操Fit自己嘅目標亦都係為咗個女，皆因佢希望等個女嫁人時，自己80幾歲時仲可以風風光光咁參加婚禮，所以家陣最重要嘅事，就係保持身體健康，仲開始同太太一齊玩瑜伽添。
余絲韻