本文重點
香港有好幾間上市嘅體育用品公司，全部來自福建晉江，分別係安踏（02020）、特步（01368）及361度（01361），尋日多添一個同鄉──美克（00953），為咗支持同鄉，特步總裁丁水波及早前已認購美克嘅恒安（01044）總裁許連捷，尋日「孖住」出席美克嘅上市儀式，美克總裁丁思強梗係熱情招呼同鄉啦。
內地體育商又添「丁」
呢幾間內地體育商分屬同鄉，而且四位老細都係姓丁，分別係安踏主席丁世忠、特步總裁丁水波、361度總裁丁伍號及美克總裁丁思強。同姓三分親，絲絲仲見到內地著名體育商喬丹董事長丁國雄，佢話日後考慮來港上市，如果成事嘅話，香港上市公司嘅福建「丁氏幫」會多一位成員。
絲絲記得特步來港上市時，丁水波話與恒安嘅許連捷係同鄉，而且恒安係福建第一間公司來港上市，所以佢好敬佩許連捷，所以兩位「孖住」出席美克上市儀式。
上市儀式當然唔少得公司送禮畀港交所（00388），美克本身係生產及銷售運動裝，所以揀咗波鞋做禮物，但呢雙係非一般嘅波鞋，係鍍金嘅波鞋，非常別出心裁。
余絲韻