被譽為「流行音樂之王」（King of Pop）嘅ＭＪ喺去年中逝世，不但掀起連環追思活動，唔少玩具商亦隨即推出限量版米高積遜紀念模型，實行以另一種商業形式「緬懷」呢位樂壇天王，連彩星都決定加入追星行列。

今年推貨 股價急飆

想當年彩星攞到「忍者龜」玩具產品嘅特許權，大賺特賺，雖然近年旗下玩具銷情大不如前，但彩星並未氣餒，繼去年宣布會喺二○一二年再推「龜仔」新玩具東山再起後，今年原來又有好路數，泊到音樂商品公司Bravado呢個碼頭，為一代舞王ＭＪ推出一系列模型及人偶珍藏品。

去年ＭＪ嘅「Moon Walk」及「喪屍版」模型已掀起一陣炒風，所以彩星打算再下一城，以其經典舞姿、音樂及華服為題材創造一系列招牌造型，首批產品將於今年推出，估計會被訂購一空。

彩星股價尋日就受消息刺激，午後抽升近兩成半，收報○點九六元，單日升幅逾一成八。

余絲韻