本文重點
已故嘅台塑集團創辦人王永慶有「台灣經營之神」美譽，家族第二代嘅王雪紅又以HTC（宏達電子）喺手機生產商中異軍突起，而家族第三代亦一啲都唔簡單，尋日與和電香港（00215）合作喺港澳兩地推出網上音樂服務嘅KKBOX，原來就係由王永慶嘅外孫簡民一與其拍檔一手創立，而喺網上侵權問題嚴重嘅情況下，KKBOX竟然喺3年內轉虧為盈，果然係傳承咗「經營之神」嘅家族因子！
KKBOX夥拍和電香港
簡民一尋日同絲絲講，佢喺○○年於美國史丹福大學畢業後，就與同學林冠群趁着科網熱創業，並且由最初嘅系統整合業務，到○三年進一步拓展至KKBOX嘅網上音樂業務，公司嘅業務模式更由當初唔被睇好，喺短短3年後取得盈利，時至今日更加係台灣最受歡迎嘅網上音樂服務。簡民一仲話，佢喺年輕讀書時，最鍾意係聽樂隊Beyond嘅歌，而佢尋日仲喺記者會上，與和電香港嘅流動電訊營運總裁龍佩英合唱Carpenter嘅名曲。
講番和電香港與KKBOX今次合作，除咗以真正嘅固網及流動匯流服務作賣點，更係KKBOX進軍台灣以外市場嘅第一步，簡民一仲希望KKBOX明年可進一步登陸內地市場。
余絲韻