本文重點
香港會計師公會尋日公布「2009年度最佳企業管治資料披露大獎」得獎名單，對於小股東嚟講，企業資料當然披露得愈多愈好，乜都唔清楚就投資，同倒錢落海無分別，之但係企業大小事項日日新款，又點披露所有呢？加上喺金融海嘯後，一旦企業「劣績」斑斑，要佢哋將劣績公告天下又談何容易。喺動盪嘅去年，攞到最高殊榮——鑽石獎嘅企業，只剩下擂台躉中電（00002）及機管局。
公會為咗表揚透明度高嘅企業，分別喺五個界別設立獎項，但今年只有中電及機管局守得住，分別連續七年及五年獲鑽石獎；去年獲鑽石獎嘅希慎（00014）就「降呢」，仲要連降兩級只得金獎；去年喺Ｈ股公司組別得鑽石獎嘅深圳高速公路（00548）更名落孫山。
會計師公會收緊評審
對於呢個結果，籌委會主席羅卓堅話鑽石獎得主少咗，某程度上係因為公會收緊準則，針對企業風險管理、內部監察、關連交易等元素作更嚴格評核，唔代表企業資料披露水平下滑。公會將準則講得明明白白，希望企業管理層都會效法。
余絲韻