本文重點
早排冷鋒襲港，絲絲每日都只係想瞓喺被窩裏取暖，因為天氣真係凍得嚇人，不過呢日就畀絲絲知道有個朋友竟然無懼寒風參加毅行者，捱住兩度低溫，仲要負傷上陣行足100公里，佢就係長跑發燒友──恒生（00011）助理總經理張樹槐（Walter）。
絲絲一向都知Walter鍾意運動，不過就估唔到佢今年玩埋「毅行者」咁激，原來佢今次仲係「處男下海」第一次參加！Walter賽前幾個月已開始積極備戰，可惜喺三個星期前一次實地集訓時，嚴重扭傷左腳踝，被迫暫停訓練養傷，聽講佢喺比賽前一日，仲要接受物理治療！
高層贊助 梁太讚Well done
所以喺比賽當日，Walter要帶傷上陣，佢仲要面對冷鋒嘅考驗，因為大帽山唔單止大風，入夜氣溫更低過攝氏兩度。Walter同佢另外3位馬拉松好手頂硬上，充分發揮「毅行者精神」繼續前行，征服咗足足廿幾個山頭！
Walter今次咁落力，除咗佢本身夠堅持外，原來都得到成班恒生高層鼎力支持，兼且做埋贊助人，副董事長兼行政總裁梁高美懿、個人銀行業務主管兼執行董事梁永祥、總經理馮孝忠等都有份贊助，並加以鼓勵。當梁太知道Walter備受傷患困擾仍然成功行完100公里，更大讚「Well done」！
余絲韻