港股尋日終於有番個似樣反彈，經早前一跌，市場信心好似麻麻地，不過個別股仔就繼續發癲，每日都有升近倍嘅神仙股。是好是壞古晨就唔識分，但炒過龍有時未必係好事。
現時全球都關注美元貶值問題，過去半年有唔少醒目資金紛紛追入一啲擁有大量資源嘅股份，當中以澳洲礦業股最受注視。隨着澳元不停咁升，澳洲礦業股吸引力亦慢慢下降。半新股中國鐵鈦（00893）本身擁有攀西地區豐富嘅釩鈦磁鐵礦，同埋一眾鐵礦石資源，可發展空間甚大。
隨住澳元等外幣升值，外來鐵礦石漲價在所難免，鐵鈦產品自然亦水漲船高，明年盈利自然睇高一線。睇番股價，都知鐵鈦係寶，除咗上市後幾日有收集外，之後日日升到唔停手，皆因班大戶搶唔夠貨，趁澳元強勢自然再炒上，一於博上6蚊，止蝕位不妨考慮4.4元。
古晨