本文重點
雖然近期住宅樓市出現調整，但係工商舖市場表現仍然唔錯，有「摸王」之稱嘅投資者黎汝遠，近期就以重賞鼓勵代理為佢出貨，並特設「群龍奪寶顯神通」大賽，由即日起到明年二月十三日（即農曆年三十晚），促成最高金額嘅地產代理行同代理從業員，分別可以得到價值六位與五位數字嘅足金金牛一隻。而暫時以美聯工商舖商業部領先，因為該公司最近促成黎氏旗下金鐘力寶中心2座35樓一海景戶嘅摸貨成交，涉資約3,314萬元。
講開獎賞，置業18每個月都會獎勵營業額達到指定目標嘅代理，每人可獲1,000元或3,000元的現金獎賞，而十月份派出嘅「金牛」就接近50張。
何文田凶宅低價拍賣
中國人對凶宅向來忌諱，業主開價唔夠吸引都好難賣得出。Vincent收到風，忠誠喺今日拍賣18個單位，包括何文田常盛閣中層凶宅單位，面積1,250方呎，開價530萬元，呎價4,240元。有代理老友話，同類單位呎價一般介乎5,800至6,500元，即係上述單位開價低市價約三成左右。
其實個凶宅喺上月初曾經拍賣過一次，當時開價都係530萬元，而且曾獲承價去到580萬元，不過最後未達業主要求而收回。
（Vincent Lau）