本文重點
每逢年尾，好多大公司都例牌討論吓員工今年嘅花紅及來年薪酬調整幅度，港交所（00388）亦唔例外，尋日佢哋開董事會討論今年第三季業績，聽聞都有傾吓員工今年嘅花紅及來年嘅薪酬調整。
傳港交所送「意外驚喜」
港交所今年首三季賺咗34.75億元，與去年全年埋單共賺51.28億元相比，只相差16.53億元。傳統上第四季港股成交例旺，加上今年有咁多新股排隊上市，當中更有多隻熱門新股好似民生銀行咁，港交所員工今年嘅花紅及明年加薪幅度應該幾可觀。
至於即將喺明年一月初退休嘅港交所行政總裁周文耀，臨別秋波，斷估佢嘅花紅應該唔錯。絲絲聽聞除咗花紅之外，港交所仲會有個「意外驚喜」畀周總，以獎勵及表揚佢過去咁多年來對交易所嘅貢獻。究竟呢個「意外驚喜」係乜？絲絲都好想知道。
其實周文耀自○三年重返港交所，確係交足功課，喺佢嘅領導下，港交所嘅成本控制得宜，股價更加係升咗好多倍，更重要係交易及結算系統100%冇「當機」。今年九月，港交所便被評為「亞太區電子交易最佳場地」，所以周總喺退休前獲獎勵都唔出奇！
余絲韻