本地魚缸繼續闖關

不過，祖國魚缸又死唔去，缸邊友認為暫無通脹壓力，無需要收緊貨幣政策，下半場本地魚缸回復升勢，更在大笨象呢個火車頭領導下，升至超過15個月高位。恒指盤中高見22,644點，散場收報22,627點，升359點或1.6%；國企指數罕有地跑輸，升93點，升幅不足1%，收報13,460點，主要因為紅色金融股抖氣，未有發揮力量。現貨場成交額微升至727億元，期貨場又轉炒高水38點，只要外圍魚缸醒醒定定，本地魚缸今日可再下一城，挑戰二萬三點心理關口。

大笨象勁升近6%，收報94元，股價急升5.3元，已為恒指帶來190點進帳，魚缸過半升幅全靠大笨象。古勝早料大笨象派成績表後發威，皆因上月花旗大部分金融股均能交出一份勝於市場預期的成績表，而大笨象質素更佳，料其第三季度業績見得人，即使花旗業務仍要大幅撇帳，但估計未來這方面業務的撇帳只會減少，在大笨象股價落後魚缸的情況下，急起直追係意料中事。

另一巨無霸祖國移動（00941）亦升逾2%，不過祖移只係趁高興，以其業務表現及目前的經營環境，實難對其寄予厚望。大笨象勁升，更帶動本地其他錢莊股做好。

航天萬源升勢未止

至於已派發季度成績表的QQ（00700），9個月純利36.48億元人仔，增長九成，雖然管理層表示，第四季業績充滿挑戰，惟「野豬」出吹水報告將其目標價由149元上調至200元，刺激其股價升逾4%，報收149.2元，大隻佬中排行第三位，升幅僅次於大笨象。

紅籌股近日積極重組，先有越投（00123）跑出，昨日航天萬源（01185）以每股8粒神批盪，股價再升逾7%，盤中高見1.12元52周高位，孖屐憧憬批盪集資係為咗收購注資而鋪路，升勢有餘未盡，料可再下一城。缸湖傳聞，下一間有大動作的紅籌係深圳國際（00152），仲話股價走勢係越投翻版。有冇咁厲害，古勝烏卜卜。

所持資產價值不菲

不過，深國早於去年已開始出售非核心資產，同時又加強公路及物流投資，估值料有提升。深國目前持有深圳高速（00548）2,457萬H股及10.66億A股，持股總值超過60億元。經減持南玻A股後，目前仍持有1.077億股南玻A股，市值約20億元。

單計上述持股，總值已逾80億元，仍未計入其他資產，其股價較資產值已有折讓。「麥記」吹水報告估計其NAV每股為0.82元，現價PB只有0.75倍，以1倍PB計算，股價可見0.82元，此水平預測市盈率也約10倍左右，現價實屬超值，一旦落實任何重組或注資，股價要見1元亦非難事。

古勝