借美股做好，港股周五有明顯支持，恒指高開後整日在高位徘徊，收市升350點，報21,829點，令全個星期埋單計數，轉跌為升，有76點或者0.35%進帳，恒指能夠輕微高於20日線21,829點收市（國企指數更是大幅拋離），如果下星期能夠重返21,953點阻力樓上，港股短期的調整好大機會已經告一段落，筆者仲有希望見得到今年的終極目標23,500點。

搵大落後股難度高

股市逼近兩萬二，要搵大落後股票難度自然愈來愈高，藍籌股中，撇開向來旺市無人吼的公用股，中國移動（00941）都算失威，年初到依家仲跌緊5%，筆者見唔少股民都煩惱緊，如斯田地，應沽貨轉追焦點股？抑或繼續守落去好。

常言道，多隻香爐多隻鬼，中移落後，主要係多兩間3G供應商加入血拼，大孖沙驚中移上客減慢，用戶消費被價格戰拖低。

不過，最近對手聯通（00762）的iPhone月費開高，3G服務費大平賣並沒出現，筆者屬樂觀一族，三間3G即使一齊投入服務，現時2G主導的每戶每月平均消費，再跌的機會唔大，反而智能手機得到3G網絡發揮威力，一些中用量用戶增加數據瀏覽，網絡商收入結構重點，會由量變成質，上客或者減慢，可是消費增長可以彌補。

中移盈利由○四年417億元（人民幣‧下同）到○八年賺1,128億元，複合式年增長近42%，未來兩年在推廣及新網絡折舊增加，即使業績持平，11.5倍預期市盈率已屬近年谷底，充分反映短期缺乏增長，1.48萬億港元市值，未來幾年最少每年由營運產生近2,000億元的企業，以現金流量去看，估值確有被低估之嫌，而人民幣收入，港元股價所產生的每年3%至4%匯兌好處，更唔使多講，總結揸貨者，仲係乖乖等收成比較亂去高位接火棒好。

戴峰修