豪宅過1萬蚊一呎都唔係好耐前嘅事，估唔到短短時間，創出7萬蚊一呎嘅世界紀錄，好似股票升穿重要阻力一樣。金管局新任總裁陳德霖證實向本地銀行發出指引，要求2,000萬元以上物業按揭比例由七成降至六成。現時超過600萬元嘅物業印花稅要畀樓價3.75%，連各類佣金及律師費，炒豪宅5%至6%升幅都只係平手離場，豪宅交易成本高昂，對投機者造成一定限制。

講番股市，近期科技及工業股普遍表現唔錯，市場憧憬海嘯之後，電腦及手機市場今年開始步入復甦，尤其智能手機應用頻繁，而微軟新視窗推出，估計也會刺激個人電腦出貨量，從○九年的負增長回升過來。年初至今，最大液晶顯示屏生產商冠捷科技（00903）升112%，內地個人電腦生產商聯想集團（00992）升121%，手機代工一哥富士康（02038）升185%，手提電腦機殼生產商巨騰（03336）升308%。

全球五大液晶顯示屏生產商之一的唯冠國際（00334），因為與華冠簽合作備忘，發展近年大熱的LED屏幕及太陽能電池，周五勁升三成，睇番年初計累積升幅不過100%，同行中都算執輸。落後當然有落後理由，經營上，唯冠的確不及同行冠捷，至少後者在上半年逆境中，總算仍有利潤，執筆時成績表仲未曝光，但由早前盈警，已打定輸數，揚言六月底止全年業績有重大虧損，理由包括現金流不足，減慢向供應商還款，令供應鏈不順暢影響生產，銀行收緊信貸所致。

資本密集且利潤低

顯示屏生產屬資本密集行業，加工利潤又低，供應鏈控制唔好，業績都難有起色，唯冠○八年業績見紅，○四年至○七年，生意額介乎87億元到162億元，純利只得2,600萬元至1.8億元，純利率0.2%至1.7%，低得可憐。

上半年蝕13.2億元，幾乎將股東資金一鋪清袋，由13.7億元跌到4,100萬元，仲未計下半年！能唔能夠靠當炒的太陽能概念及LED Panel起死回生，仲係未知數，周五火燒冷灶確係惹人憧憬，但要小心新計劃即使一片光明，唔伸手都係無水大搞也。

戴峰修