本文重點
絲絲性格向來大方，有着數一定預埋各位讀者。近期國際金價仍企穩在每安士1,000美元樓上，窩輪發行商法國巴黎銀行為咗迎合市場需要，本月中推出「法巴黃金輪」，提供認購證及認沽證畀投資者選擇，希望大家可捕捉今次黃金升浪。尋日絲絲與法巴股票及衍生產品部聯席董事郭小菱（Shirley）傾電話，先知道原來佢哋搞咗個「法巴黃金輪」有獎問答遊戲，有機會贏取一安士黃金金幣。絲絲計過數，一枚金幣兌番港元都差唔多價值八千幾蚊，都幾吸引喎。
答中抽獎人人玩得
有金幣送，絲絲自然要問吓Shirley點樣參加呢個遊戲啦。原來呢個係一個問答遊戲，一共分4個階段進行，每階段都會問散戶5條問題，當中包括黃金窩輪以及一啲基本買賣窩輪嘅知識，答中所有問題嘅散戶就可參加抽獎，有機會贏取金幣。Shirley話任何人都可以參加呢個遊戲，唔一定要有買法巴推出嘅窩輪；另外，金幣上面印有牡丹花圖案，寓意「富貴吉祥」嘅意思。
余絲韻