股民識驚即係未升夠

佢點解咁睇好？香港經濟真係已經走出谷底咩？詹培忠話原因好簡單啫，因為依家啲股民仲識驚個股市，喺咁嘅情況下，個股市仲有排升。咁又係，傳統智慧話畀大家知，當全民皆股，個個都唔識驚咁撲入股市時，就係離場嘅時候。

佢仲話近排個股市係咁升，但成交唔算好大，都係因為啲股民驚。佢睇依家個市，跌少少就會反彈，即係大漲小回，跌唔落呢！

對於股價表現同股市成交息息相關嘅港交所（00388），詹培忠話以前都有炒過吓，佢無講近排有無炒，但就話同候任總裁李小加已經食過幾次飯。佢一向主張打破港交所壟斷，咁佢又有無同小加講呢？佢話大家食飯都係講客套說話，但佢仍然堅持「合久必分」，話港交所由八六年四會合一至今，應該將創業板分出去畀其他有意者經營；不過佢都明白咁係幾乎唔可能嘅事，原因係政府依家咁弱勢，點會肯做呢啲嘢？

余絲韻