話說有次佢同班投資者要去哈薩克一個油田視察，眾所周知，油田梗唔會喺市區中心，佢哋要包架飛機去油田，坐嘅係「螺旋槳」飛機，全架機只有10個座位。

飛機一邊座位一邊油缸

咁都未算出位，飛機一邊係座位，另一邊竟然係油缸，都算奇景。原來個油田位處沙漠，冇機場同跑道，飛機冇得加油，惟有喺飛機上存備足夠燃油。

艾秉禮講笑話如果你嫌呢架飛機太過出位，可以選擇坐車，但要坐足12小時；亦可以坐直升機，但都要坐4粒鐘，中間要停一次加油。吓？絲絲好難想像坐直升機要坐4粒鐘，所以話，從事石油礦務等真係唔係易事，有血有汗呢！

另外，絲絲聽聞財爺原本今個禮拜二帶隊去中東推介香港，依家已取消咗活動。不過，本月二十九日及三十日會喺北京舉行京港經濟合作研討會，政府已開始邀請業界參與。

余絲韻